زمن بياع حكي

واحلام ما تنحكي

وليل قفل شبابيكه

وفرش نجومه ليّ ولكِ

أذكر غطيتك بشال فضي

وغطيتيني بشرشف ليلكي

وابتدا الشوق ياخذنا

لدرب رصيفه من الآهات

واشجاره  تراقبنا وتشتكي

واحمرت الأوراق  من خجلها

والغصون ضمت بعضها

تتشبه بيّا وبكِ

وباقي الليل صعب ينقال

لكن أعيد

زمن بياع حكي

واحلام ما تنحكي

الليل سوق

والكل يبيع همّه

واحد يبيع عمره المسروق

وثاني يشرب بديه سمّه

وثالث عطشان حب

ويدور من يلمّه

ورابع يزرع الريحان

وما يقدر يشمّه

وخامس حبيبه ضاع

يدور عليه وهو عند كمّه

الليل سوق والكل خسران

والرابح الحزن

الله يخرب بيت أمه

الليل سوق وبضاعته أحلام

خيمه تعرض الحب

والحزن معروض بعشرة اخيام

عرضت أوجاعي

وما بقي من دقايق وأيام

وقلب مفتوح يسيل منه الألم

بضاعة رخيصة

من يشتري ويمسح الآلام

يا عابرين سوقي

يا مدورين الوله والغرام

بعنا ما بقى بالعمر

بنظرة حنونة

بكلمة

بقصيدة شعر

والله حرام

قلب طيب

وشايب حبيب

باطراف سوق الليل

وده يلحق أحلامه وينام

ومرت بنيّه

تمشي شويه شويه

قلبت قلبه يمين

ثم قلبته شمال

وقالت قلبك بكم

صابه ذهول

ما عاد يدري ويش يقول

سكت ..

ردت عليه :

انت أبكم ؟

أقول قلبك بكم ؟

قمت أتلعثم

قلت خذيه ببلاش

ضحكت وقالت :

شايب وخفيف دم !

بس قلبك مليان هم

وجودك بهالسوق غلط يا عم

وقبل لا تروح

لملم قلبك المجروح

والحق زمانك اللي فات

مات وقتك

ولكن وقتنا ما مات

ايه جابك بهالسوق

سوق الليل ينبض بالحياة

وانت رجلٍ تقدمها

ورجلٍ ينقصها ثبات

عزتي لمن فاته الوقت

وبتالي الليل

يشتري بالوهم أوقات

الليل سوق ووقت ومسافات

رجلٍ يبيع قلب

وبنتٍ  تقول هات

بس كل كلمة

وكل حرف

من اللي فات

حلم شاعر

يشتكي حمى السخافات

الليل سوق

وما ربح به

إلا من ركع ثلاث ركعات